讀法律做歌手 J.Arie做埋法律節目主持

J.Arie港大法律學士畢業，但佢就唔做律師，為咗自己嘅理想轉行成為歌手，早前仲拍埋電影。

不過J.Arie識法律呢個一技之長，真係唔係人人都識o架，佢早前就被香港電台電視部邀請，為法律節目《裁決．法門》擔任60集主持，可以將佢讀法律嘅知識學以致用，節目會以輕鬆手法，與多位知名大律師向觀眾講解法律常識。

第一日開工，拍足8粒鐘，收工後J. Arie膊頭痛兼口乾：「為咗保持做主持應有形象，我不停提醒自己腰背要挺直，又要背大量主持稿，收工後第一個感覺全身散晒，但又好過癮。」

唱歌、拍戲、主持三樣工作，J. Arie始終最鍾意做歌手，只要唔影響唱歌嘅情況下，佢都希望能夠多啲參與唔同類型嘅工作，豐富自己嘅經驗。