【電影LOL】Amazon一次過開拍5季《魔戒》劇集版 Season1成本已經36億！
傳統荷里活片廠要開源節流，不時傳出裁員或關閉旗下子公司消息，反觀近年冒起嘅串流平台就洗錢如倒水，次次買片出價都創新高！早前Netflix宣布以天價投資2集《神探白朗》系列電影，又密密無停手投資大量劇集；另一串流平台Amazon亦不停大手筆買版權、開拍劇集！
Amazon確認開拍改編自J.R.R. Tolkien同名小說《魔戒》劇集，並確定於紐西蘭取景拍攝。近日紐西蘭經濟發展及旅遊部長Stuart Nash接受訪問時透露，Amazon計劃於當地開拍5季《魔戒》劇集，單係首季預算已經高達4.65億美元（相等於36億港元），將會成為史上最貴製作費嘅劇集！
要將《魔戒》故事成真確實花費不菲，單係小說版權就高達2.5億美元，佔咗預算一半。加埋要起多個中土世界村落及場景，仲有大量特技化妝、戲服及後期製作，需要大量人手製作，單係人工都唔少嘢！減咗版權費，2億幾美元製作費依然驚人，因為當年神劇《權力遊戲》堪稱最貴劇集，第1季都只係用咗1億美元！
《權》推出之後大受歡迎，戲中演員片酬跟住水漲船高，劇集去到後期越拍越貴，依家《魔戒》首季就用2億幾拍，之後4季點收科？不過據聞啲場景往後幾季繼續用，理論上除非片酬大增，否則應該唔會好似《權》咁不停加大製作費。
《魔》咁大舊錢轟落去紐西蘭度拍，為當地製造過千個就業機會，偏偏當地反應兩極。因為紐西蘭政府會提供1.14億美元嘅稅務寬減，變相用納稅人嘅錢補貼《魔戒》拍攝。由於成本太高，紐西蘭財長就表明今次單deal有「明顯財務風險」，不過旅遊部長就認為《魔戒》場景足以吸引世界各地嘅fans去朝聖，實搵得返咁話！
20年前由Peter Jackson執導嘅電影《魔戒三部曲》成功將小說嘅中土世界化成實體，事隔多年開拍劇集版，相信一眾《魔戒》迷要求更高，億億聲嘅製作費除咗整靚啲景同特效，劇本都好緊要，得個靚字而故事薄弱，最後拍唔足5季的話，紐西蘭朋友真係多得Amazon唔少！
尚無回應.