90年代女神
今時今日人人都可以做女神，只要影相時用特別app或者將相片執一執先放上網，真係要V面有V面，要大眼有大眼，要完美身材都完全冇難度！80-90年代唔好講話P圖，連社交網站都仲未盛行，所以當時電影及電視女明星個個都天生麗質，迷倒唔少男粉絲，而家就同大家回顧一下90年代女神級女星啦！
邱淑貞
現年52歲嘅邱淑貞，喺1987年參選港姐，但被爆出整容，忍受不住輿論壓力最終退選，佢嘅星途冇受到影響，並隨即與無綫簽約加入娛樂圈。之後，佢憑電影《最佳損友》、《赤裸羔羊》、《慈禧秘密生活》、《算死草》及《賭神2》，人氣急升，更成為唔少人心目中嘅性感女神。至於感情方面，佢喺1999年與時裝公司老闆沈嘉偉結婚，隨即息影，專心照顧家庭，做幸福少奶奶。
邱淑貞
朱茵
現年49歲嘅朱茵，1991年參演首部電影《逃學威龍2》，其後憑古裝喜劇片《西遊記第壹佰零壹回之月光寶盒》和《西遊記大結局之仙履奇緣》中飾演古靈精怪嘅紫霞仙子備受關注，電影中嘅佢美艷動人，一雙大眼令人立即有心動嘅感覺，呢個經典角色至今都冇人可以取代，係唔少人心目中嘅「一代性感女神」。
朱茵
周慧敏
有「玉女掌門人」之稱嘅周慧敏（Vivian），當年走清純玉女路綫，除咗唱歌之外，佢仲有拍劇、演戲及擔任電台DJ，當中最令人印象深刻嘅係《大時代》中飾演嘅「慳妹」。Vivian今年已經53歲，不過佢保養得宜，身上睇唔出歲月嘅痕跡。
周慧敏
李麗珍
1984年出道嘅李麗珍，早年以「開心少女組」成員身份出道，憑電影《開心鬼》系列一炮而紅，當時已經迷倒唔少男粉絲。後來佢為咗突破而轉型，拍三級片《蜜桃成熟時》和全裸寫真，由清純玉女變成性感女神。
李麗珍
蔡少芬
現年47歲嘅蔡少芬（Ada）嘅美貌並非浪得虛名，15歲參加無綫嘅超級模特兒大賽；17歲奪得香港小姐季軍。加入娛樂圈後，佢事業發展一帆風順，1998年憑《天地豪情》Diana一角獲得「最佳女主角」，成為最年輕視后得主。蔡少芬曾經上載過自己1993年拍攝TVB劇集《天倫》嘅劇照，當年佢皮膚白哲、眼大大、面尖尖及韓星「空氣瀏海」，唔少網民仲話佢靚過家下啲韓星添呀！
蔡少芬
馬黎珈而
馬黎珈而（原名：黎姿）有「愛美神」嘅外號，喺1985年憑《開心鬼放暑假》嘅一場喊戲，被黃百鳴睇中及簽約，之後再喺1990年加入無綫，多年嚟佢拍咗唔少經典劇集，例如《金枝慾孽》、《火舞黃沙》及《珠光寶氣》等等，深得觀眾喜愛。另外，佢憑電影《古惑仔》細細粒一角，成功奠定清純女神嘅地位。直至2008年，佢下嫁商人馬廷強，婚後便淡出娛樂圈，除咗做幸福少奶奶外，同時亦轉做女強人打造自己事業王國，又幫細佬打理醫學美容事業。
馬黎珈而（前名黎姿）
鍾麗緹
「美魔女」鍾麗緹（Christy）擁有高顏值及火辣身材，1993年參選國際華裔小姐奪冠後入行，之後拍咗唔少膾炙人口嘅電影，例如《破壞之王》、《第六感奇緣之人魚傳說》、《食神》及泰國情色片《晚孃》等等。近年佢轉戰內地市場，憑綜藝節目《乘風破浪的姐姐》人氣急升。
鍾麗緹
楊采妮
楊采妮（Charlie）五官精緻，氣質優雅，曾被稱為「第二代玉女掌門人」。除咗唱歌之外，佢亦有參與唔少電影拍攝，好似1993年被導演王家衛賞識拍攝武俠電影《東邪西毒》。
楊采妮
張敏
張敏係唔少人心目中嘅性感女神，佢喺1985年參加亞視藝員訓練班入行，1987年被王晶發掘，之後佢多次同星爺合作，例如《賭俠系列》、《逃學威龍》系列、《鹿鼎記》及《逃學威龍》等等，不過近年已經淡出幕前。
張敏
萬綺雯
萬綺雯（蚊蚊）喺1989年參選亞姐獲得亞軍，入行後隨即備受亞視力捧，憑《我和殭屍有個約會》馬小玲及《我和春天有個約會》藍鳳萍而爆紅，成為「亞視一姐」。除咗有樣有演技之外，佢最煞食嘅一定係一雙42吋長腿，深得一眾宅男歡心。
萬綺雯
