【「我真係好驚佢！」】前夫稱冇得見仔 小雪激動痛哭：問個仔想唔想見佢？
舊年嫁咗畀韓籍男友Robin Cheung嘅小雪，前日先至喺微博晒幸福，話老公恨睇《屍殺列車》好耐，佢去咗陪老公睇，嚇到面青青；點知到今日，小雪筆鋒一轉，突然喺facebook寫長文，控訴第二任前夫、澳籍華裔陳先生恐嚇。但為了兩人育有的小朋友，小雪一直啞忍，到今日，佢終於忍唔住要爆。(新聞連結:http://bit.ly/2chqj3w
)
小雪在聲明中強調：
1.兩人未離婚前，陳姓男子已停止付家用；
2.男方曾說送給小雪的車，唔單止冇寫小雪名，而且仲不斷迫小雪交還。
3.來了澳洲就快三年，有好幾次跟陳的家人見面，但陳一次也沒有出來；
4.兒子跌斷腳，陳未有慰問，卻投訴小雪唔識照顧個仔。
5.小雪稱，睇在奶奶份上先至報警唔搵律師，而對方不斷炫耀自己幾有錢，但每星期只付兒子$500生活費。
6.小雪發誓：「同陳聲離婚我絕無得到他任何一分亳和利益請他不要再中傷我和騷擾我們。」及後小雪接受《蘋果》電話訪問，提到第二任前夫陳先生深夜發短訊畀佢，包括指摘小雪唔畀佢單獨見仔，小雪話：「其實一直有同佢屋企人一齊食飯，只係佢冇出嚟，仲有，佢成日話要見仔，但要問仔想唔想見佢？」「小朋友唔識做戲，鍾意就鍾意，唔鍾意就唔鍾意。咁小朋友點解唔鍾意佢呢？佢以前做過乜，要佢自己先知。我個仔總之聽到佢個名都……唉，其實唔想影響到小朋友，大家都分開咗，人家都選擇咗搵第二個女人結婚，又生咗小朋友，唔明點解要三更半夜要send啲咁嘅嘢。」「我唔搵律師搞多嘢，因為想尊重佢屋企人，尤其佢媽咪係一個好負責任嘅人。」講到激動，小雪忍唔住泣不成聲：「由結婚直至離婚到今日，都係佢媽咪一手一腳去幫我哋，我其實真係好唔開心，我真係唔想煩佢媽咪。我結婚唔係同佢媽咪而係同佢，一個好唔成熟好唔負責任嘅人，一直都冇履行佢應該要做嘅嘢，到今日我都覺得佢媽咪好辛苦。」「如果唔係佢媽咪係個咁好嘅人，可能我同我啲小朋友已經死咗，我同佢一齊真係受咗好多委屈同埋好辛苦，但為咗小朋友，為咗生活惟有忍，但最終都冇辦法一齊，因為佢已經同咗第二啲女人有溝通……」小雪又話：「其實以前啲嘢唔想提咁多，我真係好驚佢，希望佢放過我同小朋友，佢每個禮拜都係畀500蚊我，佢如果唔想畀，我自己諗辦法生活，包括架車係好舊，只係用嚟代步畀小朋友返學。我從來冇攞過佢嘢，我希望佢身邊嘅人，求下身邊嘅同佢講吓，唔好再騷擾我，唔該。」另外，小雪話希望陳先生嘅媽咪（前奶奶）唔好咁擔心，因為自己都係人哋媽咪，知道佢個仔令到佢好擔心：「希望我第二任丈夫有一日成熟番啲，唔好再令媽咪擔心佢。」小雪不忘感謝現身老公Robin：「好多謝o依家老公，為咗照顧佢同仔女，係每日做三份工，冇得放假，好負責任。」會唔會再生小朋友？「我同現任老公都經過磨合期，始終佢冇生過小朋友，但由上年到今年，大家都配合都生活節奏，大家都好為生活努力，暫時唔會諗住。其實都好對唔住自己老公，唔想用額外錢，但佢都當咗我啲小朋友係自己，覺得唔生都冇所謂。」
