【男神崩壞】陳冠希開Live滿面癦屎素顏嚇親人 網民：仲老過4大天王！
陳冠希、余文樂、謝霆鋒、吳彥祖及馮德倫當年被稱為圈中五大男神，佢哋不但風靡萬千80同90後少女，去到而家亦未有人可以打入呢個男神級別。陳冠希雖然攞正牌做壞男孩，不過就深受電影界歡迎，憑住《無間道》、《頭文字Ｄ》及《千機變》等電影聲名大噪。雖然陳冠希後來因為淫照事件而宣布無限期退出香港娛樂圈，不過2010年就喺台北宣告復出樂壇。
陳冠希雖然踩返入娛樂圈，不過一向有性格嘅佢並冇對自己嘅形象非常介懷。39歲嘅陳冠希(Edison)婚後與太太同囡囡定居美國，早前喺社交網站開直播同粉絲互動，零P圖素顏樣即刻引起網友熱論。雖然陳冠希而家仍然表情多多，可惜滿面癦屎同鬚根、深深嘅法令紋、魚尾紋，再加上大大嘅眼袋，令到網民都嚇親，紛紛留言表示：「男神變大叔啦！」、「仲老過4大天王，點搞」「男人明明40歲先最型，佢39變到60咁樣真係報應黎XD」、「似大陸民工」、「佢終於有醜樣既一日」及「歲月不饒人啊」等等。另外，仲有人話無間道搵啱人，陳冠希同依家嘅劉德華一樣老。亦有網民再次將陳冠希同天敵余文樂比較，話佢哋當年鬥到你死我活，估唔到多年後兩人外型都巧合地未老先衰。
