謝氏父子冒雪「玩蕉」 謝霆鋒拉埋謝賢出片解開揈香蕉之謎
近排最多人講嘅一定係港版Gordon Ramsay － 謝霆鋒，霆鋒喺內地節目《十二道鋒味》經常一邊chok一邊煮嘢食，當中嘅神級絕技揈香蕉，更加成為大家熱門討論話題。霆鋒見揈香蕉咁受歡迎，噚晚佢就喺社交網站上載咗一條同爸爸謝賢（四哥）嘅片段，呢條片片長大約3分鐘，佢哋冒著大雪喺條街為大家示範同解開揈香蕉之謎。
片段開始嘅時候，霆鋒就話要解釋俾大家知揈香蕉嘅由來，佢仲問旁邊嘅四哥，記唔記得喺佢細個嘅時候點樣引佢笑同教佢開香蕉，但係四哥就話唔記得晒。之後，霆鋒就將兩條香蕉放喺腰嘅兩旁扮西部牛仔，配合動作咁講話要揸住兩個椗位，將香蕉由上揈向下就可以開到條香蕉。
查看相片
雖然四個把口話唔記得，不過當佢拎住兩條香蕉嘅手法，就知佢嘅回憶返晒嚟啦！四哥仲爆竅門，就係要「咪一咪」個蕉椗。可惜條香蕉太生，四哥未能成功示範。
查看相片
喺片段尾聲，霆鋒話四哥仲有拆椰青肉嘅秘技，仲話日後叫四哥表現俾大家睇添呀！
片段一出之後，唔少網民大讚佢哋好sweet、好搞笑、估唔到背後有咁感人嘅故事、父子感情好好等等。希望霆鋒快啲找數，大家都好期待睇四哥嘅拆椰青肉秘技呀！
